जुगाराने संपवले अख्खे कुटुंब, पत्नी मुलांचा खून करून पतीची आत्महत्या

नागपूर : नागपुरातील दयानंद पार्क परिसरात एक खळबळजनक घटना घडली आहे. एका घरात पती-पत्नी आणि त्यांच्या दहा व चार वर्षाच्या मुलाचे मृतदेह आढळले. पतीने गळफास लावून आत्महत्या केली असून पत्नी व दोन्ही मुलाचे मृतदेह रक्ताच्या थारोळ्यात आढळले. एकाच कुटुंबातील चौघांच्या मृत्युनं नागपूरात खळबळ उडाली आहे.

मदन अग्रवाल या व्यक्तीनं घरातील दोन मुलं आणि पत्नीची हत्या करून स्वतःही गळफास घेऊन आत्महत्या केलीय. जुगारामुळे कर्जबाजारीपणा आणि आर्थिक विवंचनेतून त्यानं हे पाऊल उचललं असल्याची प्राथमिक माहिती आहे. मदन अग्रवाल हा चायनिय स्नॅक्सचा स्टॉल चालवायचा. गेल्या काही दिवसांपासून तो दडपणात होता.

आज सकाळी घरातून कुणीही बाहेर न पडल्यानं शेजारी आणि नातेवाईकांना संशय आला. त्यामुळं पोलिसांना याची माहिती देण्यात आली. पोलिसांनी दार उघडल्यावर मदन अग्रवाल हा गळफास लावलेल्या अवस्थेत तर दोन मुलं आणि पत्नी रक्ताच्या थारोळ्यात पडली होती. बायको व दोन्ही मुलांच्या मृतदेहांवर चाकूने वार केल्याचेही समोर आले आहे.