तीनवेळा चुंबन घेतलं, विराटचं शतक झालं की तो ही कृती !

चॅम्पियन्स ट्रॉफीमध्ये भारताचा दमदार विजय, विराटच्या शतकी खेळीची चर्चा

भारत आणि पाकिस्तान यांच्यात २३ फेब्रुवारीला खेळल्या गेलेल्या चॅम्पियन्स ट्रॉफीच्या सामन्यात भारतीय संघाने प्रभावी कामगिरी करत पाकिस्तानवर सहा गडी राखून शानदार विजय मिळवला. दुबईत झालेल्या या सामन्यात पाकिस्तानने नाणेफेक जिंकून प्रथम फलंदाजीचा निर्णय घेतला. मात्र, भारतीय गोलंदाजांच्या भेदक माऱ्यापुढे पाकिस्तानचा डाव २४१ धावांवरच आटोपला. भारताने हे लक्ष्य सहज गाठत विजयावर शिक्कामोर्तब केले.

विराटच्या शतकाची अनोखी पद्धत

या सामन्यात विराट कोहलीने जबरदस्त शतकी खेळी केली. ९६ धावांवर असताना त्याने चौकार लगावत आपले शतक पूर्ण केले आणि भारताच्या विजयात महत्त्वाची भूमिका बजावली. त्याच्या या दमदार खेळीचे क्रिकेटप्रेमींनी कौतुक केले. सोशल मीडियावरही विराटच्या या कामगिरीची चर्चा रंगली.

विशेष म्हणजे, शतकानंतर विराट कोहलीने आपली पारंपरिक आनंदोत्सवाची कृती पुन्हा केली. त्याने हेल्मेट काढून बॅट उंचावत जल्लोष केला आणि नंतर गळ्यातील लॉकेट बाहेर काढून त्याला चुंबन दिले. २०१८ पासून विराट त्याच्या यशाच्या क्षणी हे लॉकेट किस करताना दिसला आहे.

अनुष्काशी असलेलं खास नातं

हे लॉकेट केवळ दागिना नसून त्यात त्याची वेडिंग रिंग आहे, जी त्याच्या पत्नी आणि अभिनेत्री अनुष्का शर्माशी जोडलेली आहे. विराट अनेकदा अनुष्काला त्याच्या यशाचे श्रेय देत आला आहे, त्यामुळे त्याच्या प्रत्येक मोठ्या खेळीच्या आनंदात तो या लॉकेटला चुंबन देतो.

२०१८ मध्ये दक्षिण आफ्रिकेविरुद्धच्या सामन्यात विराटने पहिल्यांदा लॉकेटला किस केलं होतं. त्यानंतर इंग्लंडविरुद्धच्या कसोटी सामन्यातही त्याने ही कृती केली होती. त्याचा फॉर्म बिघडला असताना काही नेटकऱ्यांनी अनुष्काला दोष दिला होता, त्यावेळीही विराटने लॉकेटला चुंबन देत या ट्रोलर्सला उत्तर दिलं होतं.

आता पुन्हा एकदा विराटच्या या कृतीची चर्चा रंगली आहे. क्रिकेटप्रेमींमध्येही ही परंपरा लक्षवेधी ठरली आहे. विराटच्या खेळातील सातत्य आणि त्याच्या यशाचा हा खास सेलिब्रेशन पुढेही पाहायला मिळेल, अशी चाहत्यांची अपेक्षा आहे.